今次全程45公里的環島游，連專業運動員也未必可以完成，難怪近年有參加渡海泳的女星衛詩雅，十分佩服方力申的勇氣：「佢都有分享過啲經歷畀我知，話以前試過有外籍朋友本身係專業泳手，點知游長途賽時死咗，有叫我注意安全。我游渡海泳都係1公里啫，佢依家要游45個維港呀！一定辛苦！如果有機會我都想試吓，即使係訓練過程，相信我都會有好多得着，絕對係人生挑戰。希望佢一切順利，安全為上！」