方力申疑中暑四連嘔自扣保命

方力申昨日在Instagram上載兩段短片，首段見在海中的他按着浮波，一臉痛苦說頭暈：「仲有差唔多兩公里就到淺水灣，兩公里之前，同隊友講咗bye bye，其實係唔畀一個人游，但係頭先我都講過頭痛，因為啲海浪、喺海再等就更加暈，我話唔得，我寧願慢慢游，你哋一陣追到我再追。如果再停喺度曬住，我塊面又曬到有啲痛，我唔掂喇！我會嘔，其實我依家都可以嘔。」而另一段片，見小方先後扣喉四次並作噴射式嘔吐，不少藝人包括關智斌、吳若希等留言說加油，同時大批網民表示心痛，認為他不應搵命博，擔心其安危。

仲識講笑：唔通Call水警？

小方接受本報電話訪問，坦言拍片當日游剩最後2公里時，因頭暈開始支持不住，故惟有冒險拋下隊友，獨自先游到終點，他說：「自己一個人游返嚟都驚o架，但我真係等唔到，因為喺水等，漂吓漂吓仲暈，又費事喺佢哋面前嘔，惟有慢慢游返去，期間就頂唔住嘔。（最後2公里繼續游？）梗係游埋啦，唔游邊個帶我返去？如果唔係，要call水警，或者搖白旗等遊船河啲人捉我走咩？唔會啦！咁瘀！捱埋佢囉！」

不少網友擔心其狀態，小方指可能在剛過去的周六及周日都游10公里，出現輕微中暑及脫水：「之前兩日天氣熱，要不停咁游，無形中會消耗唔少水分，加上啲海水又涼，會飲少咗水，所以出現脫水情況，會想嘔同頭痛。到今朝我6點操水，游咗4個鐘，依然都係有啲頭痛。」他指泳手游水時出現頭暈非常普遍，有需要時會服暈浪丸：「游10公里前食咗薯仔，嘔嘅時候已經游咗8公里，因為我食過啲朱古力味嘅energy bar，所以嘔出嚟咪咁嘅色。」並笑言為免引起觀眾不安，上載片段前已把嘔吐聲「滅聲」，又指每次練水都會帶一個繫着其腰部的浮波，內有食水、食物及攝錄機，故兩段片都是自拍。

10月升級練游30公里

自3月練水以來，最長一次是游17公里，小方透露計劃於10月初開始加操游30公里，11月個人挑戰當日才正式游45公里：「所以挑戰當日真係好睇狀態、體能，鬥智鬥力。之前冇諗過咁辛苦，始終泳池水同海水係好唔同，仲有海水嘅水質同逆流等等唔同因素，都會影響表現。」而昨晚他上載邊敷面膜邊感謝各界關心的短片，並說：「除咗屎尿屁之外，大家連嘔都咁鍾意睇，哈哈！依家我最需要係眠一眠同敷mask補濕。」

現年39歲的小方於9歲開始接受游泳訓練，為兩項香港個人游泳紀錄保持者，現在更是首位挑戰環島游的華人，是次挑戰希望籌集450萬港元善款，讓45萬名缺水的貧困人口提供潔淨食水。據環島游官方網頁顯示，截至昨日已籌得逾170萬港元，當中藝人佘詩曼及丁子高分別捐出10萬元及5.5萬元作支持。