廖倬竩肚腩當腹肌仆住玩瑜伽
港姐十強昨日接受特訓，自稱玩開瑜伽的廖倬竩，示範瑜伽動作時論論盡盡，更失平衡一仆一碌，十分搞笑。凸出「肚腩仔」的她堅稱是腹肌，又指不會節食，擔心太餓沒精神備戰決賽。
《2019香港小姐競選》十位候選港姐昨日穿上Bra Top，到旺角一間健身中心接受導師體能、泰拳、瑜伽的「最強特訓」，當中以黃嘉雯及古佩玲身形最弗，姚懿芠與廖倬竩則露出「肚腩仔」。
「瘦咗15磅」
黃嘉雯與廖倬竩做瑜伽時展現「硬淨」一面，身體柔軟度麻麻。黃嘉雯的動作勉強，廖倬竩更失平衡變成「滾地葫蘆」，場面爆笑。事後廖倬竩說：「我有玩瑜伽，但係啲動作太難先仆倒，我拉唔起隻腳呀。（因為肥嘟嘟拉唔起？）唔係呀，我瘦咗15磅，開始有腹肌。（『聰明人』先見到腹肌？）真係有o架，哈哈！」又指雖然臨近決賽，但不會節食，認為一定要多吃東西，否則沒精神備戰。
而黃嘉雯自言少做拉筋及瑜伽，近期頻頻重溫歷屆港姐決賽，備戰問答環節，但因壓力大及捱夜，面部爆「壓力瘡」，會狂敷面膜及吃得清淡。
楊詠彤否認打前度
至於楊詠彤繼被爆「吸乾」前度男友「翻版阮兆祥」金錢後狠撇對方，再有爆料者指她分手期間經常夜蒲飲醉，而男友要求分手時被她「爆樽」，眼眉位置被鎅傷，縫針後留疤痕，她對此否認：「冇咁嘅事。（分手有冇嗌交？）普通情侶嗌交就有。（嬲到出手？）冇呀，當時拍拖都幾Sweet，之後因為性格唔啱，所以和平分手。（分手後成日飲酒？）唔係，嗰段時間因為單身，所以可以約多啲朋友出去，但就冇話飲醉酒。」她坦言不知道誰人爆料，亦沒聯絡前度。