廖碧兒忙爆一家人難見面
廖碧兒昨日出席品酒比賽的評判，她表示近期忙於出席這類活動。因家人居住不同地方，弟弟一家住北京，家姐住英國，父母則住阿拉斯加，而她每星期3日在溫哥華返學，4日在香港開工拍劇，本來早前家姐到加拿大可以順道一見，可惜夾不到時間，她笑言：「成家人好難夾時間見面！」
正修讀營商學位的她剛考完試，未料即病倒，加上又要拍劇拍廣告，瞓覺也沒有時間：「再讀多3個月就完成課程，呢個學位係完成我參選（港姐）時未完成嘅課程，對我做生意好有幫助，尤其有關商業法律嘅條例。」笑言幸好考試分數不錯，但最大壓力是要趕拍劇兩邊飛。
廖碧兒在波爾多的酒莊今年成立10周年，將會搞慶祝活動，稍後她前往當地代表酒莊出戰全馬拉松賽事，暫時她跑到16K，會量力而為，以跑畢21K即一半路程為目標。