林穎彤怕影響星途求老闆批准拍拖

林穎彤受訪時不停傻笑，緋聞男友伍富橋則一臉緊張。

林穎彤與緋聞男友伍富橋、王卓淇及謝東閔等，昨日出席明珠台《八大行星》記者會，期間謝東閔將緋聞情侶擺上枱開玩笑。Bella與Alvin受訪時表現尷尬，女方更不停傻笑。問到是否拍拖？她笑說：「我哋係好朋友，之前被人影到我哋行街，其實我哋一齊學唱歌。（發展中？）唔係，係同公司嘅好朋友。（有發展機會？）係老闆安排我哋學唱歌，有冇發展機會要老闆批准。（佢批准你哋就拍拖？）努力宣傳新歌先。（叫公司出合唱歌畀你哋？）我唱好自己啲歌先。」

夾定口供

問Alvin回應時，Bella即叫記者錫住對方：「你哋唔好嚇親佢。」而Alvin與Bella口徑一致：「我哋係非常好嘅朋友，公司安排我哋學唱歌。（有發展機會？）睇老闆意思，老闆想我哋工作行先。（覺得Bella點？）非常好嘅女仔。（係你對象？）好好嘅做朋友對象。」Bella亦指男方是好對象，但驚有緋聞令老闆誤會：「所以做好朋友先，唔想行差踏錯影響星途。」

王卓淇晒靚膊搶鏡。

謝東閔拿緋聞男女開玩笑。

她又透露最近推出新歌《你永遠是最好》，MV以懷舊風格拍攝：「狄以達睇完個MV，笑我個轉圈動作唔得，要再學過。」