Steven簽字結婚咀燶面老婆:會改過!

張致恒正式成為人夫!昨日他與雯雯帶同萌B上律師樓簽字結婚,大騷婚戒又啜爆老婆。自稱「大個仔」的他誓痛改前非,承諾對老婆一心一意,並預告會儲錢於明年補擺喜酒!

藝人張致恒(Steven)今年7月投下「震撼彈」,突然宣布婚訊兼自爆做爸爸,昨晨他與未婚妻歐燕雯(雯雯)身穿禮服坐車抵達律師樓,抱住囝囝的他面露微笑,與面燶燶的雯雯成強烈對比,雯雯更拒絕放下灰色外套合照,然後直上律師樓簽字,圈中好友只有張彥博觀禮。

Steven禮成後單拖落樓,其後雯雯抱B會合,Steven錫老婆面頰並說:「尋晚瞓唔着。(講咗咩愛的宣言?)冇咩,會用行動表達。之前呃咗佢好耐,其實我哋上年已經同居。(唔係同當時女友April同居?)嗰時已經搬走咗,但未分手。」他坦言事情令一家三口成「箭靶」,揚言要洗心革面並致歉:「希望大家畀多次機會我,之後會好好咁錫老婆同BB,畀個好嘅成長環境佢,對老婆一心一意。」問到雯雯聽到老公「愛的宣言」有甚麼感受?她只簡單說:「多謝。(會百分百信任老公?)係!」

儲錢明年補擺酒

Steven透露證婚人是爸爸及外母,家姐張詠恩因工作未能趕來,之後會與親友飲茶,晚上親自下廚與老婆燭光晚餐。稍後中秋,他會到內地拍戲一個月:「希望愈做愈好,我會好好改過,反省咗一個月,每日照顧老婆、囝囝同煮三餐,大個仔喇,唔再犯錯,好多謝身邊嘅人冇放棄我。」問有否邀請關智斌(Kenny)及Twins等觀禮?他表示只通知親友:「可能會用一年時間儲錢,出年9月2日擺酒。(Kenny有祝福你?)在心中。(Twins Unfollow你Instagram,依家關係點?)識咗咁多年,嬲都明白,想同佢哋講對唔住,令到佢哋嬲、唔開心,希望佢哋原諒我。」

雯雯:我真的很快樂

事後Steven接受電話訪問,為老婆燶面解畫兼道歉,指她非圈中人,面對傳媒難免不知所措;晚上他再在社交網解釋:「佢只不過係一個普通人,未見過咁多傳媒影相,再加上超級緊張,所以先會唔識得畀反應,希望大家唔好介意。」而雯雯亦發文稱「很快樂」:「今天我真的很快樂,其實心情超級緊張,原諒我不懂面對傳媒,就係因為太緊張,所以先搞到冇表情,我想喺度多謝大家嘅祝福。」此外,Kenny好友張敬軒亦取消關注Steven的Instagram。