蔡少芬凸肚素顏孖張晉接女放學
懷有六個月身孕的蔡少芬（Ada），昨日偕老公張晉到學校接兩女放學，穿上鬆身衫肚凸凸的她一臉素顏，四肢依然纖瘦，她翹住老公張晉拍拖往學校，之後張晉拖住大女楚兒，她則拖住細女信兒。信兒見到大批記者，即用英文笑問：「點解咁多人嘅？」而張晉負責開路一支箭先往座駕，隨後Ada微笑婉拒受訪，問到腹中BB性別？她未有回答，之後一家人登車離去。
洪天明大仔怕醜
至於洪天明的大仔TJ亦就讀同一學校，他拖住細囝JT現身，勁怕醜的JT匿在其背後，又搞笑地扯住爸爸衫尾入學校接哥哥。當TJ見到記者時，古靈精怪的他第一時間用手遮面，然後笑問：「點解成日都見到你哋嘅？」天明表示每逢休息就會做湊仔公管接送，稍後會返內地拍劇及傾生意，臨走又教囝囝向記者講再見才上車。
