林子博做湊仔公帶患癌妻拜神祈福
隨着傳統學校新學期展開，不少星級家長昨早冒着颱風兼黃雨下送子女上學。早前自揭太太患上罕見癌症第四期的林子博，亦充當「帶子洪郎」，接兒子放學後帶他去買波鞋兼食快餐，兩仔爺全程有講有笑，之後再會合太太往附近廟宇拜神祈福，一家人名副其實「風雨同路」。
太太Shirley患病至今數月，子博無論在精神及心力上都很吃力，但依然撐起成頭家，返工之餘，又照顧一對仔女的起居飲食，昨日獨力為兒子卓楠的開學張羅。早上約11時許，子博現身囝囝位於灣仔的學校門外等放學，由於卓楠開始發育，經過一個暑假後運動鞋已不合穿，兩仔爺即徒步到附近的特價鞋店買鞋替換，隨後再到連鎖快餐店醫肚。卓楠全程拖實爸爸，當遇上同學及家長時，他們亦停步寒喧。
戴口罩防菌
未幾子博接獲電話，即與兒子趕往銅鑼灣，此時戴上假髮、帽子及口罩的Shirley正站在商場內等候，三人商討一會，即冒雨前往大坑蓮花宮參拜祈福。戴上口罩的Shirley看來精神不錯，化寶、上香都親力親為，逗留約半小時離開廟宇，有婆婆遞上紅紙一張，子博掏出錢包添香油，為太太「接福」。
事後記者與子博聯絡，他指自本報報道太太病情後，兩夫婦接到多方問候和支持，他說：「太太知道自己有病後，匿埋喺屋企一段日子，直至早前有患上同一類腫瘤嘅同路人，喺社交網私訊佢，大家有傾有講互相支持，太太開朗咗好多，最近都肯出吓街。有個泰國醫生透過中間人聯絡我，話佢媽媽有同一種病，佢將會去美國同相關嘅組織開會，佢叫我畀埋太太嘅病歷，到時可以一齊傾，但我又唔夠專業咁去處理，所以希望搵到腫瘤科嘅醫護人員幫忙跟進。」
善心人捐助
他坦言不少圈中人主動聯絡慰問，有些更從不認識：「一句問候已經好足夠，何況仲有有心人主動存錢落我哋嘅戶口，話幫我太太嘅醫藥費。坦白講，嚟緊嘅日子好漫長，我都有經濟壓力，真係要應使得使。」