羅天宇圓母星夢開竅剝衫搏盡
藝人羅天宇（Joey）在新劇《她。她。她的少女時代》中表現亮眼，飾演要求嚴格的健身室老闆，他為了一場除衫戲而展開三個多月的地獄式減肥，戒鹽、油、糖，只吃白烚雞胸、菜及健康餐，是他人生中最瘦的時期。講到難忘場口，除了要跟姚嘉妮上演一場激情接吻戲外，還要對田蕊妮（阿田）破口大罵，對Joey來說都是突破。他大讚阿田是非常犀利的演員：「佢好吸引人去睇，我同佢拍戲嘅時候，會不自覺咁變咗觀眾去欣賞佢，跳出咗個角色，同佢拍嘢有呢個難度，因為佢太好戲。」
重燃鬥志洗底
常被外界覺得他無心工作，Joey承認以前欠方向及目標，做事得過且過，直至拍攝《跳躍生命線》方知要搏命：「拍完《愛．回家》有兩年冇劇拍，當時有諗過係咪唔好等？唔知要等到幾時？好感激《跳躍生命線》嘅監製，喺曙光愈嚟愈微弱嘅時候，幫我撥開雲霧，畀個咁好嘅角色，所以我一定要做好。」除了不想辜負監製期望，Joey的母親一直希望他演藝事業有所成就，令他重燃鬥志：「媽咪都入過訓練班，但佢讀咗一半就冇讀，所以想我幫佢圓演藝夢，佢成日叫我你快啲努力啲，我走埋你都未紅。」
唔想拍散拖
感情方面，Joey雖已跟湯洛雯分手，但名字還常連在一起，Joey認為在所難免，亦不介意，並稱兩人是好友關係，未能走到最後感可惜。至於是否準備展開新戀情，他坦言：「整體個人未Ready，唔想拍散拖，冇咁多心機或心思重新去建立，而且仲未遇到啱。」
服裝：Ted Baker
髮型：Martin@Hair
化妝：BUBU@Anjo Makeup
場地：Mad for Garlic（Causeway Bay）