黃寶欣戴假面具做人
最近重返樂壇的黃寶欣與黎明詩，將於9月11日與一班八、九十年代歌手攜手開騷，兩人表示期待多過緊張：「呢段日子成日見，好似以前參加新秀歌唱大賽咁！感受到嗰種凝聚力，回憶返晒嚟。」眾人多年後再重聚是緣分，令大家更加珍惜，明詩笑說：「天地南北乜都傾。」寶欣則笑說：「八婆嘢又傾。」
當年兩人退出樂壇後，幾乎跟圈中人斷絕來往，寶欣說：「以前唱片公司係唔畀你亂咁講嘢，仲叫我唔好露咁多真面目畀人睇，當然對記者更加要小心，但對同行都要！所以我哋歌手間只係Hi同Bye，唔會有電話。」黎明詩也認同，指當年歌手間有很大隔膜：「大家係好少傾偈，唔知人哋鍾唔鍾意，人哋行埋嚟又會諗你想點？有好多隱憂喺度，但依家可以展示真我。」
「太大壓力會癲」
兩人雖然會懷念昔日做歌手的日子，但覺得始終不適合娛樂圈，寶欣說：「我只適合唱歌！」更加沒想過再闖樂壇，甚至開個人騷：「我真係承受唔到太大壓力，我會癲！有人搵我出唱片但都拒絕咗，以前一做訪問就好有壓力，因為好多嘢唔講得，我個口快過個腦，變咗會驚囉！」