掹囡囡車邊 董敏莉搵學費
藝人董敏莉（Monie）日前與女兒「子子」拍攝廣告，笑言平日會帶同囡囡開工，囡囡盡得真傳，很有模特兒天分：「可能佢睇得多學識擺甫士，加上笑容多，好似幾適合呢行！」她不反對女兒做童星：「依家係客戶想搵佢，我掹車邊先有工開咋！呢兩個月賺咗兩年學費。」
愛女開始返學，Monie爆她熱情「撩男仔」：「佢一見男同學就主動撩人玩，嚇到對方喊晒口。我叫佢要矜持，女仔要等男仔追先馨香。」她與梁漢文主演的ViuTV新劇即將推出，戲中兩人有激吻，表示不會讓囡囡睇：「佢仲細個，費事佢叫錯爸爸，搞到老公呷醋！大個同佢一齊睇番，當性教育之餘，畀佢知道媽咪嘅工作。」