超盈提早開刀誕8磅「荷包蛋」

賭王何鴻燊與四太梁安琪的長女何超盈榮升媽咪,提早兩周於前日開刀,誕下8磅多重磅「荷包蛋」,超盈與老公辛奇隆看到B女一刻十分激動,超盈喊得比BB還厲害。而四太整晚陪伴在側,看到第一粒孫大為感動,已向賭王報喜訊。

何超盈原定預產期在九月中,前日「荷包蛋」提早開刀出世,重8磅多,母女平安,前晚超盈回覆本報稱多謝:「我啱啱先瞓醒,有咩搵我媽咪啦!」據知超盈老公辛奇隆全程陪入產房,並為BB剪臍帶,BB出世一刻兩人十分激動。辛奇隆步出產房時用普通話說:「超盈哭得比孩子更激動、更大聲……」並第一時間向賭王報喜添孫。

眼仔睩睩似媽咪

昨日凌晨四太回覆:「BB好多頭髮,管家珍姐第一時間攞番超盈細個本相簿出嚟對照,眼仔睩睩似足超盈,BB女係小包,媽媽係個大包。」對於超盈生B感動到喊,四太感觸說:「我好理解,生產前一個月佢好辛苦,體重不斷增加,每隔一段時間就以為自己生得入院,好緊張,依家終於可以放下心頭大石,呢種感覺一定要做咗媽咪之後先會感受到。」又稱超盈早上入院開刀前,擔心得大喊,喊聲弄醒了賭王和四太,經安慰後心情才平復下來。四太說母女平安,全家都好興奮:「呢個係我第一個孫,全家都嚟齊晒,連親家都嚟埋,產房外面變得好熱鬧。依家啲人叫我一聲婆婆,我都不得不認老喇!」

四太唔夠瞓忙湊孫

四太昨日下午2時許現身醫院,面帶倦容,感謝大家替超盈開心:「首先感覺超盈係大個咗,BB出世後我就唔再接受訪問,因為要湊孫好忙。(你眼腫腫好感動?)係唔夠瞓!」問到超盈可有說生B好辛苦?她說:「事實生小朋友唔係件簡單事,教兒育女更加要有心機,望個孫『荷包蛋』快高長大。(對『荷包蛋』有乜期望?)最緊要健康。(送咩畀孫女?)呢啲遲啲先。」她稱昨晚整晚在醫院並照顧何生。而榮升舅父的猷亨說:「大家都好開心,帶咗個新成員嚟屋企。」據知家人會為BB搞百日宴。

另外,「荷包蛋」契爺名人陳栢熹昨日亦到醫院探望,稱送鑽石給契女,又為BB設計氫氣球形月餅盒,代表步步高陞;而「荷包蛋」契媽嚴紀雯身在外地度蜜月中,稱已看過契女照片,大讚得意,會送金碗金筷子給契女;超盈好友莊思敏則送祝福給BB。