田蕊妮新劇內地網民嗌罷睇
藝人田蕊妮（阿田）因早前於社交網站甫文暗指警方記者會無限Loop疑諷政治時弊，即引起內地網民不滿，有指要罷看其主演的無綫劇《她。她。她的少女時代》，而官方微博亦未有為該劇宣傳。該劇主角之一的曹永廉昨日於電台接受訪問，對於有關傳聞，他說：「我哋都有宣傳，嚟緊26號套劇嘅宣傳活動，阿田都有份出席。每個人嘅立場我哋唔可以參與，但佢係非常好嘅演員。（官方微博冇為套劇宣傳？）最近我日以繼夜咁拍劇，好少睇。」
李佳芯聽過《殺手》被抽
同樣是「視后」的李佳芯，亦因網上留言捲政治風波，並有傳遭內地封殺，昨日她為劇集開工，對於傳被封殺，無綫無奈抽劇及易角，她說：「我覺得好被動嘅，公司有佢哋嘅安排，相信公司衡量過先做決定，會尊重公司決定。（工作有冇影響？）暫時冇影響，依家拍緊《愛美麗狂想曲》。（有兩部劇易角？）收到通知《BB來了2》會延遲到出年先拍，原因就唔知。（《殺手》停播？）都有聽過《殺手》會抽起先，原因就唔係好清楚。（代言廣告有冇受影響？）啲廣告都仲有合約，大部分都係今年頭先開始，經理人都有Update我，暫時冇聽到對我唔滿意嘅聲音，我暫時都係做番好自己先，希望件事之後淡咗會好啲啦！」
對於李佳芯傳被封殺，無綫企業傳訊部回應：「近期香港發生連串暴力衝突，某些藝員可能受內地觀眾關注及引發敏感情緒。無綫劇集、節目一直以來在內地發行，故需要在營運上作出某些調整，這純屬商業決定。」
