傳方駿暉過檔myTV SUPER 馮盈盈激情旁述似買餸
全新「myTV SUPER 18台」賽馬頻道將於9月1日開台，近日網上流傳殿堂級評馬人方駿暉將強勢加盟！馮盈盈則在前哨節目中向艾粒挑機旁述賽馬，又自爆讀大學時曾在馬會兼職一年，最開心以不同造型開工，發揮其Cosplay潛能。
myTV SUPER全新賽馬頻道「myTV SUPER 18台」，將於9月1日正式啟播，為馬迷提供本地賽馬資訊。為隆重其事，myTV SUPER已邀得多位重量級馬評家坐陣，但人選一直未公布。近日，網上有消息指殿堂級評馬人方駿暉將會離開有線賽馬節目，不少馬迷即估他會過檔myTV SUPER講馬！據知，無綫將有線賽馬節目的台前幕後班底「打包」撬過檔，除了盛傳的方駿暉，還包括晨操專家積奇與「講馬之王」文東。
返馬會兼職玩Cosplay
除了打造最強主持陣容，myTV SUPER 18台日前特別在沙田馬場拍攝前哨節目《後生仔傾馬仔》作宣傳，由前港姐馮盈盈、高海寧與組合艾粒唐劍康（Donald）、甄子康（少爺占）及主持鄺家銘笑談馬圈趣事。盈盈在節目中自爆讀大學時曾到馬會做兼職，推廣流動投注應用程式，人工還不俗：「嗰陣每個星期都返工，最開心係返工經常有唔同嘅造型，好似法國淑女、和服少女，仲有Cyber造型添！時薪有三位數o架！」鄺家銘笑問「三圍」數，盈盈笑說：「我三圍數字就比較小，但嗰陣人工就好好。」少爺占即笑說：「你層樓第一桶金就喺嗰陣賺番嚟o架啦？我夠試過着條短裙仔去應徵囉，唔請我之嘛！」
盈盈隨後又以激情聲線旁述賽馬，保持一貫「嘈吵Style」，十分爆笑，但被艾粒寸爆指似去街市買餸。到少爺占旁述時，她反擊說：「我細細個就聽你哋做節目o架喇！係咪有DJ聲線去旁述？」Donald玩挑撥：「占爺佢挑你機喎！」又取笑少爺占的旁述似喊驚。充滿奇想的盈盈被問到在「婦女銀袋日」可以加入甚麼新元素？她笑說：「不如我扮馬，然後畀高Ling騎？」少爺占喝斥笑說：「夠喇！我哋係18台啊！唔係18歲台呀。」
艾粒呻難：唔知點分騎師
受訪時，盈盈指當時在馬會兼職一年，最開心能夠發揮其Cosplay潛能：「嗰陣返工好開心，返一日工有成四位數字，最難忘係啱啱識男友寶寶，跑夜馬嗰陣佢仲特登過嚟接我放工添，真係好體貼！」又自言是艾粒的粉絲，首次見面更邀兩人合照：「唔好意思都要講，我真係由細睇佢哋睇到大，初中已經聽佢哋節目，又唱佢哋嘅搞笑歌，好似『我我我我有胸部……』今日見到佢哋好似小粉絲咁呀。」
艾粒讚敢言的盈盈沒有包袱：「見佢咁佻脫，我哋咪收啲囉！佢幾破格，但都有分寸嘅，依家好少咁講到嘢嘅年輕人。」問到可有興趣挑戰旁述賽馬？少爺占笑說：「真係好難，特別我哋呢啲對講嘢咁有包袱，接受唔到講嘢太快，咬字唔清楚。」Donald則笑說：「除咗口快，仲要眼快，旁述係冇稿，都唔知點分邊個騎師。」