農夫即興棟篤笑叫祖兒補場
容祖兒在第14場紅館演唱會「賣大包」，請得組合農夫加演「棟篤笑」，二人搞笑話觀眾可要求「退飛」或「補場」，笑到樂壇天后頻認錯；之後祖兒當住袁詠儀面前，公開與其夫張智霖的「秘密同居關係」。
祖兒連踩14場紅館《PRETTY CRAZY演唱會》後，昨日終於「休場」一天，有假放自然心情靚，故前晚請嘉賓特別加碼，她在「紅磡360」吊車與胞弟容逸恆對唱後，在人海中「扮」遇見農夫，但兩位成員陸永及C君上台後卻踢爆：「扮咩驚喜？大家一早知我哋係今晚嘉賓啦，下場係草蜢！」C君表示相比之前的張學友、古天樂等巨星級嘉賓，自認是「垃圾」，故笑言戥當晚觀眾「唔抵」。
錫歌迷錫到Crazy
陸永則說：「搵我哋先夠Crazy係咪？原來容祖兒你真係黐線o架！」C君笑言不會唱任何歌免折磨大家聽覺，但隨即唱起《刻不容緩》，又自稱沒自信，在娛圈是「庸庸碌碌半生」後再「搞事」：「如果在座任何朋友想退飛，唔需要唔好意思，我都退咗。」令祖兒笑不停。陸永指祖兒錫歌迷程度已達Crazy，更說：「咁今晚係咪要補（場）？咁嘅嘉賓，衰成咁。」全場爆笑！
農夫離場後，祖兒以一首《祝君好》迎來男神張智霖（Chilam）上台，更當眾爆料：「我哋係同居關係！」原來是指與對方住同一大廈，又指常在寓所停車場和電梯遇見，但同台則是第一次。Chilam指兒子被祖兒吸引，覺得是緣分，令彼此「friend咗咁多」。祖兒為向農夫「回禮」，昨晚在IG上載去年與農夫未出街已被公司「禁」的合唱歌《港女收港男皮》，笑言太高興。