湯洛雯認有新對象徹底DQ羅天宇

向來喜歡在網上留言抒發情緒的湯洛雯，日前突然於網上晒愁爆相，表示：「有點累的感覺，身和心。」不少網民紛紛問個究竟，她只留言：「…」而舊愛羅天宇亦回覆：「…」好友莊思明見狀取笑他們：「唔好喺度打波（摩）斯密碼！」湯洛雯即反擊：「佢抄我O架！」一班網友即留言叫兩人復合！不過，昨日她發文狠狠地澄清與羅天宇只是好朋友，將來亦不會復合，態度相當強硬。

零機會復合

昨日湯洛雯現身將軍澳電視城錄影節目《Do姐有問題》，被問到近日是否有心事？她再次重申同羅天宇無復合機會：「心情OK呀！每個月間中都有幾日有心事，其實係好耐冇upload相，咁啱搵到張咁愁嘅，就寫咗啲九唔搭八嘅嘢，啲人就以為我有事。我之後都再出post講唔會有機會復合，因為唔想大家咩事都（同羅天宇）有關。我哋唔會割席，因為我哋真係好朋友，只係想撇脫咁講將來唔會復合或曖昧。」更揚言有了解中的對象，近年也有識朋友，但未發展到情侶關係。

共識做朋友

對於湯洛雯斬釘截鐵指復合機會是零，羅天宇透過短訊回覆：「冇乜特別呀，大家都有共識仍然係好朋友，我諗佢只係唔想其他人有太大期望。」