AGA掛住寫歌喵喵失蹤

歌手江海迦（AGA）昨日微露小蠻腰現身電台宣傳新歌《Everyday》，她表示近期閉關寫新歌，預計明年初推出第三張個人大碟：「有成年幾冇出碟。（點解隔咁耐？）要自己寫歌。（唔係寫得好快？）冇快過，哈哈！最近仲有小插曲，有日寫緊歌突然唔見咗隻貓，搵咗成間屋兩個鐘都搵唔到，最後上埋廿幾樓逐層搵，嚇到媽咪搵晒全屋苑，點知原來佢匿埋咗喺我衣櫃入面個櫃桶唔出聲，可能啱啱搬屋要霸地盤。」