夏萍設靈林家棟哭別契媽

夏萍的喪禮以佛教儀式進行，靈堂橫匾寫上「往生淨土」四字，靈堂照是夏萍面帶笑容的彩色照，靈堂前方擺了三個心形花牌，分別署名契仔林家棟、兒子德基一家及女兒惠兒。多位圈中人亦致送花牌悼念，包括劉青雲夫婦、錢嘉樂夫婦、吳君如及佘詩曼等，而前來送別的有謝賢、契妹雪妮、黎耀祥及黃智賢等。

契仔林家棟於下午4時許到達殯儀館，戴上口罩仍難掩倦容，他表示想先幫手打點，說罷匆匆步入靈堂。打點一輪後，他脫下口罩步出受訪，期間數度落淚。他透露契媽想土葬，因為怕火，提到夏萍的壽年眾說紛紜，他說：「佢身份證寫大啲，因為當年嚟香港方便搵嘢做，但我都照計番佢講過嘅81歲。其實佢嘅嘢我唔係知太多，因為佢性格倔強，唔係好想講自己嘢。（有咩難忘回憶？）喺電視台合作廿幾年，我好欣賞佢咁率直，成日用粗口鬧我，大家互相問候，好開心，佢又好關心我，我畀蚊咬佢會幫我(口架)，好似阿媽照顧小朋友咁 。」

夏萍生前極為疼愛家棟，病重時仍苦撐半個月，只為見他一面。	林家棟與夏萍子女所送的花牌，一同擺放在靈堂中央。	謝賢揚言與夏萍「幾好玩」，留下不少回憶。

堅持見最後一面

問到夏萍身故原因，他表示對方7月底中風，加上高血壓及糖尿病：「醫生用藥物去維持生命，但年紀大，好難做大動作嘅醫治，我當時喺內地開緊工，有問醫生可唔可以捱到我返嚟，結果捱到兩星期，我見到佢最後一面！」此時家棟激動得哭起來，問到夏萍遺願，他說：「佢擔心走咗之後會點，我話有我喺度，唔使擔心。我可以做嘅就係陪住佢，十年前已經想安排佢入護老院，但佢唔肯，之後佢喺屋企跌低，十個鐘先有人知，我同杜Sir（杜琪峯）即刻安排佢入安老院，三日內搞掂。佢成日問唔知走之後會點，我話我叫得你做阿媽，你叫得我做仔，我一定會照顧你到尾！」說到此處，他忍不住抹眼淚，場面感人！

黎耀祥送別前輩。	錢小豪	雪妮與丈夫前來致哀。

張國強讚有風格

至於夏萍臨終時陪伴在側的張國強，直言陪伴對方走最後十日：「最印象深刻係我哋鼓勵佢要等到家棟，好似有種力量咁，佢真係等到家棟返嚟，之後釋懷咗，第二日就好安詳咁去，睇到佢一份堅持。」談到二人的難忘回憶，他說：「有好多，佢演過我媽咪，大家有講有笑，有時我收工都會車佢返去，佢個人好幽默，有時令大家啼笑皆非。佢好有個人風格，好直言，值得我哋學習。」並透露已瞻仰遺容，讚夏萍的妝容比平時更靚，很安詳。

而謝賢逗留約半小時，僅簡單說了幾句：「入去鞠個躬，大家老友鬼鬼。（拍戲有冇難忘事？）好耐冇拍戲啦！（以前呢？）以前梗係好多時一齊，我同佢係幾好玩嘅！」