謝霆鋒紅館騷等到灰 祖兒氹番

霆鋒自2000年舉行「活着VIVA LIVE演唱會」後，未有再在紅館舉行大型演唱會，期間轉戰美食界做Chef Nic，直至去年初宣布回歸樂壇，更預計今年會開港騷，但一直只聞樓梯響。前晚他擔任祖兒《PRETTY CRAZY》紅館演唱會嘉賓時，祖兒說：「謝霆鋒一路好想繼續同大家開演唱會，你哋想唔想呀？」全場觀眾起哄：「想！」但Chok慣的霆鋒無奈地說：「話時話，我想同呢個空間（紅館）講，我入咗紙兩年，一次又一次被推翻，再推我就唔開喇！」祖兒聞言擔心霆鋒「講得太盡」，連忙幫他兜：「唔好咁講，你知唔知我呢個騷都攞咗好耐期先有，無論等到邊日，總之大家都會等你啦，係咪？」觀眾報以歡呼聲支持。祖兒又不停問觀眾霆鋒是否好靚仔，笑說：「食咗防腐劑呀！」

聞王菲名曲速逃

祖兒指霆鋒雖然Cool，但擁有溫柔的心，感激他為撐場專程返港，霆鋒說：「其實大家知唔止我一個，仲有好多人都會撐容祖兒，因為佢係一個抵撐嘅人。」祖兒聽完霆鋒的「盲撐論」後，即掩面大叫好感動，自High表示二人由細玩到大，會互相為對方的成功而開心，更扯埋霆鋒女友王菲落水：「歌都有得唱啦：『你快樂所以我快樂……』」霆鋒如被擊中要害，其欲逃之夭夭的慣性反應再次令全場大笑。而前晚捧場的星級觀眾還有霆鋒媽媽狄波拉、側田、許晉亨父子、祖兒胞弟及弟婦，還有楊受成夫婦等。