「送水輝」許家傑陷財困借錢度日
入行十年的「送水輝」許家傑，演藝路歷盡艱辛，試過冇錢畀家用，靠借貸度日變「度水輝」，但他從沒想過自己是否適合娛樂圈發展，只不斷努力改變自己去適應，包括操肌練大隻。
現年36歲的許家傑，2009年勇奪港男冠軍後入行，兩年前憑處境劇《愛．回家之開心速遞》中「送水輝」一角，與「大小姐」林淑敏成為觀眾受落的螢幕情侶。他早前接受電台訪問重提未紅前的日子，坦言大部分只飾演手下、侍衞與醉客等閒角，一度非常消極，甚至冇工開要借錢應付開支：「以前收到冇對白嘅角色，都難受O架！會諗『乜唔係畀新人做咩？』我都做咗兩、三年，算半新人啦！所以有一段時間係好負面，唔想開工同會好嬲。」
由於工作量少，許家傑試過經濟拮据到不能畀家用：「有幾個月得幾千蚊人工，好拮据！有段時間仲要借貸度日，分12個月還！因為試過咁，所以覺得有嘢做係好難得。」雖然「錢」路茫茫，但他沒有想過自己是否適合娛樂圈，反而想如何改變去適應，其中拍攝《火線下的江湖大佬》時，開始不斷自我增值，包括健身、學唱歌及上演戲班。入行十年，他在圈中贏到不少友誼，除了前輩黃光亮帶他外闖見識電影世界外，他又特別感謝「大小姐」找他一起商演。
傳搭上龔嘉欣 繼續呼冤
許家傑一直以來甚少提感情事，希望保護私隱，除了當年被傳介入龔嘉欣與鄧健泓戀情導致對方分手一事，他至今仍呼冤：「當年我鋪天蓋地解釋過，依家我再講一次，係冇介入！當時覺得好驚，我冇做過嘅嘢，點解講到好似真？嗰刻覺得更加要學識慎言。」
另外，許家傑前日36歲生日，上載切蛋糕的照片，但被林淑敏出賣，網晒高炒對方的睡覺相，但不忘祝對方：「好似主題樂園嘅熱門景點一樣，永遠咁受歡迎。」