祖兒被爆多仔追嚇到龜縮
樂壇天后容祖兒的第九場紅館演唱會驚喜連場，除自爆曾醉住做騷外，又被嘉賓蔡卓妍（阿Sa）爆她「天后唔憂嫁」，眾多追求者中有「日籍兵」，嚇得祖兒想用鞋塞住好姊妹把口，更自嘲「龜縮」。而另一嘉賓關智斌（Kenny）自爆加場喜事，老實不客氣「騎劫」大師姐的個唱。
前晚祖兒《PRETTY CRAZY JOEY YUNG CONCERT TOUR》演唱會，邀得Twins成員蔡卓妍、鍾欣潼（阿嬌）及關智斌任嘉賓。祖兒介紹Twins出場時說：「曾經喺佢哋演唱會上飲大咗，真係要好信得過、好有親切感、歸屬感，先夠膽死喺台上面飲大咗。」
有日籍追求者
期間阿Sa爆料：「我想話祖兒冇乜緋聞，但真係好多人追佢，今日已經有幾個喺度。」阿嬌接力：「係咪想講日本嗰個？」阿Sa反問：「係咪真係講得o架？」祖兒即九秒九喝止：「唔係，掩住你哋個嘴，佢哋（觀眾）冇人想聽我緋聞。你試吓再講，我拎對鞋塞住你個嘴！」但阿Sa未有就範，繼續指很多人鍾意祖兒，奈何未開始就戀情終結，祖兒解釋因事業心重，阿Sa即說：「大家好想祖兒搵到個好歸宿？」全場和應，祖兒低頭扮怕醜說：「我真係『龜縮』！」
劉浩龍認捧場
之後祖兒狂做「標童」動作，請另一嘉賓Kenny出場，合唱《死性不改》後，阿嬌爆男方9月14日的紅館演唱會加場，搞到Kenny跪拜：「嬌姐，你畀個機會我自己講啦。」隨即高舉勝利手勢大叫 : 「大家好！關智斌《KENNY is BORN演唱會》依家正式宣布加場（9月13日）。」
另外，祖兒舊愛劉浩龍直認前晚捧場：「同朋友一齊去睇，係一場好精彩嘅騷，睇完就走，相都冇影。（係咪想翻撻祖兒？）其他嘢唔答啦。」