馮盈盈「燈神」爆Watt港姐殺手
前港姐冠軍馮盈盈早前公開力撐今年參選港姐的大學師姐楊慧敏及「章子怡師妹」姚羽嘉，可惜兩人被淘汰出局，成了「燈神」的她扁嘴承認是「明燈」，還搞笑叫大家問她股市！
馮盈盈、陳山聰、汪明荃等前晚錄影節目《娛樂大家》，提到盈盈的大學師姐楊慧敏被淘汰未能躋身港姐十強，她說：「我有睇新聞，即係證明好公平，識邊個其實都冇用。入到圍嘅佳麗要恭喜佢哋，不過嚟緊佢哋都要接受好多難關同挑戰，而落選嘅亦唔代表佢哋冇得發展嘅。（楊慧敏話無損佢入行嘅決心。）咁嘅心態係好嘅，即係證明佢永不放棄。」
記者取笑她之前睇好的另一佳麗姚羽嘉同樣落選，她即扁嘴說：「即係話我係明燈啦！咁我都唔介意你哋問我股市嘅。」對於前日港姐淘汰了5位佳麗，問盈盈會否覺得非常狠？她說：「都正常嘅，年年都差唔多，都仲有10位，離決賽日子時間唔剩好多，佢哋要加油。」
姚羽嘉難捨佳麗爆喊
雖然未能晉級十強，但姚羽嘉、楊慧敏及江雨婷都無損心情，昨日分別在社交網留言，大熱倒灶的姚羽嘉休息一日重新出發，解釋前日在港姐記者會喊的原因：「係唔捨得大家！」而楊慧敏亦發文透露被淘汰心情：「眼睛生喺前面，大家唔使再安慰我，我都係志在參與。」又晒出購買機票到悉尼的截圖指：「去個旅行先！」江雨婷則發文：「很久沒睡到自然醒了，一覺醒來陽光燦爛。」看來心情未受影響。
另外，陳山聰與汪明荃提到前輩梁舜燕離世，均大表難過及突然，汪明荃更以「偶像」形容梁舜燕，覺得對方很能幹；陳山聰則全程強忍淚水，即將投入新劇的他，表示會向劇組度時間，希望可以到靈堂送別梁舜燕！