擔心老公出軌？ 李彩華佛系：冇得避

藝人李彩華（Rain）前晚出席音樂劇《羅密歐與茱麗葉》酒會，透露老公Eric身在內地工作，自己又忙於綵排舞台劇，日前七夕她飛瀋陽與老公食飯慶祝後，已有幾日沒有見面：「嗰日有收花，我哋唔係成日見，但反而好啲，日日見感情冇咁激烈。（最耐幾多日冇見？）兩個月，靠視像囉，但再見番又好陌生。（老公會突然畀驚喜你？）應該唔會，佢都唔知我住緊嘅地址，同埋又怕醜。（唔擔心佢出軌？）冇得避，要出就出，就算日日𥄫住都有機會，成日諗住仲提心吊膽，好大壓力，關係更加唔好。」談到生B進度，她指現時身體狀態不俗，預計明年年中才實行造人大計。