張家輝精人收口 吳鎮宇寸陰濕
兩位影帝吳鎮宇與張家輝碰頭擦出火花！家輝以「癲」峰形容鎮宇的容忍度，笑指每當拍攝時遇上不滿，毋須等他開口，鎮宇即9秒9衝出去「發洩」，令他內心爽到爆！鎮宇即笑對方陰濕，自誇大方得體幫大家發聲。
吳鎮宇與張家輝於新片《使徒行者2諜影行動》再結片緣，鎮宇飾演家輝及古天樂師傅，但動作戲欠奉，以內心戲居多。他自嘲年紀大，未能應付大量動作場面，故交由兩位「後生仔」上陣。
笑鎮宇「癲」峰
談到上集與佘詩曼有感情線，鎮宇坦言今集原定有安排，但最終向導演反映成功：「導演拍完第一集後覺悟，唔好再搞咁多男女感情，今次係男男，好熱血。」
面對鎮宇的率直，家輝忍不住笑對方：「佢真係夠『癲』峰！今次個角色係要佢呢啲咁『癲』峰嘅人先處理到，平時又代表晒我想講嘅嘢。喺片場我好鍾意鎮宇，因為當我見到有少少睇唔過眼嘅事，通常睇多次先，但呢個時候佢已經起火，快過我出聲，我不知幾爽同心涼，件事最終又解決，係咪好開心先？」鎮宇聞言即笑住反擊：「佢呢啲咪陰濕囉！有啲嘢係同一表達，同一情緒，但佢個樣生成咁Mean（刻薄），我就大方得體幫咗人哋，分分鐘話我意見畀得好添！」
想合作拍喜劇
談到二人曾做導演，之後會否攜手執導？家輝坦言想過合作喜劇：「劇本難搵過導演，因為唔笑就係乞人憎，界線幾危險。（有傾過？）心有呢個想法，但冇拎出嚟同人講。其實近年都好多幕後新人，我建議佢哋一定要拍社會問題做題材，電影好廣闊，天馬行空都可以發生，可以係悲情片、愛情、喜劇，即使王晶式喜劇都可以有新睇法，有好橋我唔介意合作。」
家輝化妝：Midco Chu
髮型：Edmond Fung@HH. Hair
鎮宇化妝：Kargo Leung
髮型：Joe Kwong