馮盈盈教路：咪用個肺講嘢！
港姐候選佳麗大隊昨日到熊本，會合麥明詩、馮盈盈兩位師姐拍攝外景。麥明詩與馮盈盈向佳麗教路談吐要有Point，不要講「肺話」，但吳玥彤冇講嘢一樣出醜，徒手捉魚拍攝時，因太投入而胸前走光！
《2019香港小姐競選》的15位佳麗昨早分批與麥明詩和馮盈盈於熊本的景點拍攝，麥明詩昨早先與八位佳麗到人吉白淹公園拍攝徒手捉魚，下午與馮盈盈再會合所有佳麗，到人吉駅最古老蒸氣列車前取景；她倆大讚佳麗相處融洽，盈盈說：「朝早整妝Set頭時見到佢哋一齊唱聖詩，感情好好。」明詩問她有否被感化？盈盈說：「我當堂神聖、純潔咗！」她倆會多觀察佳麗，之後大派貼士，明詩說：「佢哋答問題可以再精準啲，要有Point！」而盈盈覺得佳麗答問題可以有非典型答案：「要有自己論點，唔好用個肺講嘢！」
黃嘉雯：係佢太瘦衫鬆
之後楊慧敏（Mina）和吳玥彤在徒手捉魚拍攝時，因表現太投入，搞到胸前走光。Mina表示年幼時跟嫲嫲回鄉試過捉魚，對於人前走光，她並不知情：「以後我會留意多啲！」與Mina同組捉魚的黃嘉雯則說：「可能Mina太瘦件衫鬆身先會走光，大會服裝其實都好照顧我哋！」此行有師姐教路，黃嘉雯承認獲益良多，覺得好有用。
而姚羽嘉於熊本火車站附近取景，已習慣拍攝的她，雖然睡得少也夠精神。問到可有向師姐麥明詩、馮盈盈請教？她說：「談吐、儀態都想改善，同埋想問點樣令自己更有自信。」
特派記者陳永峯日本報道