林子博對症下藥後悔做「遲」父
無綫娛樂主播林子博的一對仔女林詠渝及林卓楠，性格大不同，大女詠渝好奇心爆棚堪稱「問題兒童」，細仔卓楠則精力充沛，令子博笑言要「對症下藥」。陪子女成長要付出很大體力，令他後悔不早些做父親！
林子博的大女林詠渝曾拍攝《我的如意狼君》、《天梯》等無綫劇集，而細仔林卓楠亦有亮相節目《爸B也Upgrade 》，雖然兩姊弟同樣充滿表演欲，但私底下性格截然不同。
問公公婆婆幾時上天
詠渝好奇心爆棚常有不少「出位」言論，令他哭笑不得：「大女由細到大都好鍾意問問題，我成日畀佢考起。有一次佢同我講，佢同學嘅爺爺上咗天空，我就話嗰位爺爺係離開咗呢個世界，點知佢就走去問公公婆婆幾時上天空，真係畀佢嚇一嚇！好在佢都好聽話，同佢解釋完之後都明白咁樣同長輩講說話係唔啱。」
放棄入產房見證
至於囝囝卓楠，子博指他簡單得多：「純粹同佢玩就得，令我有少少後悔點解唔後生啲生，可以有更多精力陪住玩，好在依家嘅體力仲應付到。」作為兩個小朋友的爸爸，他會盡力公平對待，故早在小朋友出世時已有取捨：「阿女出世嗰陣係沙士之後兩年，醫院安全措施做得好嚴謹，所以我冇機會入產房見證，到後來阿仔出世，終於可以入產房，但我覺得既然冇見證阿女出世，如果睇阿仔出世會偏心錫佢多啲，所以就放棄咗呢個權利。」
育兒貼士
1.小朋友對事物充滿好奇，經常發問，要保持耐性細心解答。
2.維持健康體魄，有足夠精力才能陪伴小朋友成長。
3.一視同仁，公平對待子女。
