林利低調娶台妹求生仔秘笈
抗癌勇士林利昨日正式「脫單」榮升人夫！他與台灣女友Erin到律師樓簽字結婚，一對新人穿上便服，在林利媽咪及弟弟見證下進行儀式，林利說：「仲緊張緊！今日個心卜卜跳未停過，有啲唔敢相信！做咗人夫開始有個責任，始終每個人都需要有個家，個心同工作都會定落嚟，我係好適合結婚嘅，嚮往咗好耐。」本來外母都來港見證，豈料護照過期，但他跟太太已打算到台灣再註冊一次。
工作忙 年底郵輪蜜月
林利笑言原來在律師樓註冊氣氛很嚴肅，當與太太咀嘴時，他講笑說：「你尋晚食咗大蒜？」好讓氣氛輕鬆一下。儀式結束後，兩口子到中環一餐廳撐枱腳：「你望吓我、我望吓你，以後就叫老婆老公，都係好大轉變。」由於沒打算擺酒，故註冊也沒有通知朋友：「真係簡簡單單，好切合我嘅個性。」
雖然已52歲，但林利坦言想生B，問到太太有喜未？他說：「你估咁容易！我會努力吓，請教吓杜生（杜德偉）點樣整出嚟。」又透露太太暫時台港兩邊走，但將來留港時間較多。他將於下個月到俄羅斯做慈善演唱會，屆時太太會同行，接住要開拍新劇《使徒行者3》，所以最快年底才度蜜月：「依家計劃去坐郵輪。」
