李蘊等多兩年復出職場
藝人李蘊（Renee）現居於廣州，昨日她帶子女返港出席活動。Renee稱女兒現已三歲，細仔下月就滿一歲。囡囡快要讀幼稚園，將和母親負責輪流接送，始終不放心交給外人照顧：「囝囝依家都好黐身，仲係餵緊母乳，大女餵母乳到歲半。」
問到可想回幕前演出？她笑說：「再等多兩年先，囝囝大啲就可以甩身，可以做吓嘢。（幫老公手？）佢做地產我唔識，其實我細細個就入行，冇做過出面工作，自己就對Playgroup、寵物有興趣。」Renee表示與好姊妹鄧紫棋和何超蓮有保持電話聯絡，問到可有向二人催婚？她說：「佢哋唔同，有事業要顧，但我都唔畀佢哋做高齡產婦嘅。」