林欣彤「做小三」未算慘
林欣彤的事業路崎嶇不平，去年失聲令歌唱事業叫停，盛傳情緒病復發，她坦承壓力對其影響大。曾經戀愛大過天的她繼續敢愛，不擔心被傷害，認為愛情的衝擊對其事業亦有幫助。
入行九年的歌手林欣彤（Mag）最近簽約華納唱片重新出發，憑歌唱比賽《超級巨聲》一夜成名的她事業路並不平坦，但認為人生總要經歷過高低磨練，才會更加珍惜所有，並一直謹記其座右銘「天將降大任於斯人也，必先苦其心志，勞其筋骨，餓其體膚，空乏其身」，上了一課，人才會成長，她說：「好似之前失聲，明明終於開到個人演唱會又要取消，嗰陣覺得好可惜，亦好唔甘心。做人要能放能收，好似放紙鳶咁，要佢升得高、飛得靚都要睇風向，唔係淨係一味放。」
克服拮針恐懼
盛傳她情緒病復發致失聲，Mag默認：「壓力情緒問題係其中一個好大嘅影響，喺好唔開心嗰段時間，真係好辛苦，聲帶嗰種痛好似有刀(界)喉嚨，加上成日胃酸倒流，長期係好大影響。」
出道至今一直緋聞纏身，早年被爆遭男友家暴、又傳是「小三」搶人男友，但她覺得所有負面新聞都不及失聲慘：「嗰三個月好辛苦，身為歌手冇得唱歌已經好慘，日常生活仲有好多問題。」期間她試勻中西療法，即使怕打針，但亦嘗試針灸：「頸、頭、肚都要落針，最高峰個肚試過有30幾針，我由好驚打針，去到慢慢克服咗。」
利用情傷谷「戲」
唱歌事業有華納這座靠山，感情上卻未有着落，她坦承一年前亦很心急：「嗰時都想拍拖，細個總覺得有人陪好啲，又眼見身邊朋友唔單止結婚，仲生埋仔，但依家我好享受一個人。」問到重情的她是否曾受傷害？她直言不可以因為怕傷害而不敢愛：「唔應該話結局係要分手就寧願唔愛，反而咁樣先係軟弱，受過傷但又可以重拾勇氣去愛，咁樣先啱。我覺得感情上有衝擊對我嘅事業都係好嘅，有呢啲經歷，唱歌、拍戲會更加有感情。」
講到與BOP天堂鳥成員Tyrese的緋聞傳個不停，她笑言彼此是好朋友，至於將來可有發展機會？她說：「我諗暫時都唔會，依家嘅我好想專注事業先，畢竟啱啱簽咗新公司，最想嘅唔係拍拖，係想快啲開個音樂會，已經籌備緊，希望可以盡快公布。」
髮型：Franco Chung@Hair Corner（Central）
服裝：Journal Standard,Beams