切前列腺抗癌 羅家英失禁用尿片
羅家英、泳兒、王灝兒（JW）及王梓軒等前晚出席預防肝炎活動，剛完成前列腺切除手術的羅家英透露已出院廿日，手術後有失禁後遺症，現時要使用尿片，預計維持3、4個月，他說：「依家冇咗前列腺癌嘅指數，之前抽八粒組織，四粒有癌，所以趁後生早啲做，老啲身體頂唔順。」
手術後太太汪明荃安心不少，他不諱言平日常被對方催促早點休息：「依家4個月做一次身體檢查，但太太好叻，健康過我，厲害到唔使瞓。（你冇嘢叻過佢？）咩都輸晒畀佢，我噤若寒蟬，冇氣同佢講。（最佳相處方法？）梗係，佢係一家之主嘛！」日內他再到橫店開工，同時斟洽黃百鳴及曾志偉的新片。
JW泳兒Check男友手機
而梓軒年底將舉行入行十周年紀念騷，欲邀請張敬軒任嘉賓：「因為我出第一隻碟時，佢幫我寫咗篇千字碟評。（佢睇中你？）佢鍾意我嘅音樂啫！佢好提攜後輩。」笑言之前欠他一首歌，會寫首歌作為報答。至於JW與泳兒被問到平日可有與男友互相檢查身體？泳兒笑說：「我會幫男友Check手機有冇電，好在都係正常，冇病毒！」JW則撒嬌說：「男友又唔係醫生，點會幫我檢查？反而我幫手Check手機有冇叉電囉！」
