譚嘉儀被轟冇公德心認疏忽道歉
歌手譚嘉儀為劇集《白色強人》獻唱的插曲《Can You Hear》Hit爆網絡，她早前到石灘拍MV，但事後竟棄置多條鏡柱於現場，變相製造大型垃圾，有居民在網上狂轟她欠公德心！而她得悉事件後已急急找導演清理並代製作組認錯。
前晚有居於西貢泥涌石灘附近的讀者投訴，指早前目睹譚嘉儀到上址拍攝MV後，石灘出現多條大型鏡柱！雖然幾條鏡柱已於日前被搬走，但目前還剩下一條未清理，附近更有鏡片碎片，讀者認為保護環境人人有責。
掛住避雨 導演認錯
據知，就此事有居民在社交網斥責嘉儀嚴重破壞生態環境、欠公德心，更以「惡行」來形容！嘉儀在電話中承認一時疏忽：「前幾日我知呢件事，話我哋毀壞環境，導演知道後都有喺網上道歉講對唔住，承認係製作人員嘅疏忽。可能當日拍完因為落大雨，大家狼狽下唔小心遺留咗啲道具冇執到，據我所知導演已經即刻搵人入去清理，我都想講聲唔好意思！我都好鍾意海洋，唔希望破壞環境。」並表示會再轉告導演，相信對方會檢查清楚，若有遺漏一定會清理：「我都會代佢哋講日後會多加留意，尤其係拍外景一定會小心，呢個係責任問題。」
派員再清理現場
至於嘉儀所屬的星夢唱片公關回覆，指公司不知拍畢MV後沒有清理現場：「正常係導演組負責晒，我哋都係見有人留言，即刻同佢講要處理，佢都有道歉仲即晚搵人入去處理。我哋都多謝有人公開事件，等我哋知道有咁嘅事發生，督促製作組以後要小心處理事情。」當得知現場仍有一條鏡柱未清理，唱片公司指已即時再聯絡導演，對方亦表示昨早會再派人查看：「可能眼大睇過龍，佢話會再Check多幾次。」