Bobby口花花喪撩群姐暈浪：要睇你支旗

歐陽震華客串處境劇《愛．回家之開心速遞》中的《波比與群姐的前世今生》，上集錄得該劇播映以來最高的32.3點收視，而下集亦有31.3點，成績驕人，昨日他偕「群姐」許思敏、劉丹、滕麗名、陳偉琪、張景淳及呂慧儀等開心祝捷。

群姐笑指Bobby令她人生增添美麗色彩，Bobby即搞笑指兩人相逢恨晚，生不逢時！群姐問Bobby會否再拍？Bobby笑說：「我永遠都OK，睇群姐。」心花怒放的群姐即自言是對方的超級粉絲，與他拍甚麼也開心，更口快快說：「Call佢返嚟拍《愛．回家》，就要睇佢支旗喇！」Bobby即抵死笑說：「睇我支旗？我不嬲插穩咗喺度，TVB係我山頭嚟，不過又唔可以咁密，等觀眾消化吓先。」

滕麗名詐型

滕麗名因拍攝電影《尋秦記》而錯過與Bobby再合作的機會，要求他再客串：「嚟到我地頭，竟然唔同我玩，真係嬲，就算我路過都好吖！」而拍過無數處境劇的劉丹，覺得為《波》拍通宵也值得，問到可希望增加感情線？他笑說：「我呢啲年紀有感情線，好似唔係好舒服。」滕麗名即笑說：「談情戲你諗清楚，要付出代價通頂o架！」

放大圖片	「細龍太」陳偉琪以低胸裙騷Quali。	劉丹講起感情戲，滕麗名即搞笑加把嘴。

滕麗名早前膝蓋韌帶撕裂，她透露康復中，不想做手術：「希望剩低嗰10%唔好斷，斷咗條筋好容易萎縮。」劉丹笑說：「筋嘅嘢真係好緊要。」