高海寧怕腳傷「出芽」戒口100日
藝人高海寧（高Ling）前晚於海灘為新劇開工，穿上透視連身短裙騷長腿，惟右腳因傷黐住大塊紗布大殺風景，她笑指為挽回靚靚皮膚，不惜勤洗傷口及戒口100日，但投訴拍檔楊明不懂憐香惜肉！
高海寧、楊明前晚到赤柱海灘為無綫新劇《網絡騙案》開工，拍攝一場高Ling與老公離婚、找來舊愛楊明哭訴的戲份，拍攝前她躲在一旁培養情緒，正式埋位時，高Ling不出三秒便流出眼淚，連楊明也不禁取笑她「老屎忽」好戲。
隔日換藥洗傷口
談到日前拍攝該劇時不慎被電單車死氣喉熨傷腳，高Ling表示醫生建議隔日洗傷口及換藥：「真係好驚，想喊，啲人叫我唔好食豉油、韮菜、海鮮、蛋類，咖啡都唔得，因為驚生肉芽，要戒100日，我會畀心機戒，唔係點着裙！楊明好衰，叫我着Boot遮住，都唔識憐香惜肉嘅！」楊明指意外發生時亦在場，眼見不少工作人員圍住了解，自己插針不入，惟有講笑緩和氣氛。
開劇叫家人咪出埠
問到男友鄧智偉是否很擔心？高Ling笑指媽咪最擔心，因事發時全家在馬來西亞與弟弟慶生：「上一次拍劇受傷佢哋喺日本，今次出事佢哋又唔喺度，仲要日日影啲食同玩嘅相畀我，我叫佢哋下次我拍劇就唔好出埠喇！」對於近期經常拍喊戲，是否欲挑戰做「悲情女王」？她說：「我本身唔易喊，但唔知點解咁多唔開心嘅角色喺我身上。」