英國萬人迷前球星碧咸（David Beckham）出名愛錫仔女，特別是對孻女夏柏舒芬（Harper Seven）。前日他就帶同7歲的夏柏及母親珊迪娜（Sandra）一齊到法國睇女子足球世界盃，更當眾與「前世情人」咀嘴，Sweet到爆！
碧咸三人行捧英格蘭國家隊對戰挪威，而一向愛足球的夏柏更着上英格蘭國家隊波衫打氣。球賽進行期間，父女睇得投入有傾有講，更與球迷玩人浪，而囡囡更請爸爸食朱古力，並當眾嘴對嘴錫錫，冧到爆！賽前，碧咸亦有帶囡囡見前隊友兼國家隊領隊菲臘尼維利（Phil Neville）及一眾球員，最終英格蘭以3比0殺入四強。其實碧咸一直希望囡囡繼承衣缽做足球員，去年上清談節目時曾透露囡囡每逢周日就去踢波，可惜三位兒子卻冇興趣。
至於碧咸父女咀嘴其實早有前科，出名愛挑剔的名嘴皮爾斯摩根（Piers Morgan）就曾開咪批評，指碧咸行為古怪兼恐怖，更反問：「點解父親要同囡囡咀嘴？真係唔明白，好恐怖同古怪囉！仲Post晒畀全世界睇，點解？」雖然有部分人士認為此舉不恰當，但碧咸曾解釋只是想用此方式來表達對子女的愛護、照顧及支持，強調亦有與兒子咀嘴。而大部分網民今次留言力撐碧咸錫女冇問題，有網民說：「佢係細路女，而嗰個係佢老竇，完全唔覺有問題！碧咸係好老竇，愛錫仔女好正常。」另有「葡萄」網民認為夏柏相當幸運，可以有個負擔得起帶她四圍去的父親。