美國女星愛瑪史東（Emma Stone）早前於倫敦欣賞英國女子組合辣妹（Spice Girls）演唱會，樂極生悲，在朋友身上騎膊馬時跌下斷骨，影響《101斑點狗》前傳的拍攝！
愛瑪是公開的辣妹死忠，她於今個月14日到倫敦溫布萊球場欣賞辣妹四缺一重組騷，當然興奮莫名，開騷前更獲安排與偶像成員Emma見面，貼面合照Selfie！不過愛瑪玩得太high，睇騷時在朋友身上騎膊馬，期間不小心跌落地，撞到膊頭，後來發現傷勢比想像中嚴重，骨頭也斷掉！
醫生建議愛瑪休養兩個月，但她在英國拍攝的《101斑點狗》（101 Dalmatians）前傳《Cruella De Vil》夏天就開鏡，未知有否影響拍攝進度。知情者透露：「佢係辣妹超級粉，睇騷時太忘形喺朋友膊頭上跌落地。開頭以為淨係擦傷，依家發現係斷咗骨。佢傷勢咁嚴重，好唔開心，佢一直為咗新片要保持最佳體能狀態，因為佢要追住啲狗嚟跑。」
愛瑪於新片飾演《101斑點狗》中由格蓮高絲（Glenn Close）飾演的奸角年輕版，老牌女星愛瑪湯遜（Emma Thompson）亦會參演，電影預計2020年12月23日上映。