李亞男笑老公湊B冇晒符
藝人李亞男昨日到九龍灣出席教育生活體驗展活動，去年底為老公王祖藍誕下愛女的她身形纖瘦，透露有營養師餐單，亦已適應湊BB，每日見證囡囡的成長變化：「佢開始可以食粥仔，會追住匙羹食。我會陪佢睇BB動物書，日日扮狗叫、扮牛叫，加深佢嘅記憶。」
祖藍向來是出色的笑匠，亞男卻笑言老公氹BB笑有一定難度：「佢出盡渾身解數，扮得好浮誇，BB先笑一下。」又透露醫生指BB身形比例偏高，將來大有機會是高妹：「十個當中排第九，好開心我嘅基因贏咗。祖藍話驚第時要岳高頭同個女講嘢，所以依家要好好珍惜囡囡仲未高過佢嘅時間！」