凡事以囡囡為先 梁詠琪拍戲當身教壞人必死
歌手梁詠琪（GiGi）自從加盟環球唱片後，忙為新作《再見灰姑娘》宣傳，她透露有信心三年內推出全新廣東大碟︰「今次合作係3年內出一隻碟、10首歌，時間係就攤長咗啲，但因為仲要兼顧拍戲、照顧家庭，目前完成咗3首，繼續環繞說書人角度，用成人角度去講童話。」
凡事以愛女行先的她，坦言在工作選擇上要作出取捨犧牲，希望多留港工作，問到是否同時爭取時間再造人？她得戚笑說︰「呢樣嘢夜晚隨時都可以，見到面就可以，但冇特別計劃，順其自然。之前試過要出埠3星期拍戲，錯過咗囡囡啲學校活動都好內疚。」她又表示現時對歌影視作品內容挑選會更嚴謹︰「戲種唔可以太黑暗，就算做壞人都唔緊要，但一定要死或受到懲罰，故事意識要正確。親熱戲本身都唔多，依家盡量唔會。（少少咀戲都唔會？）睇劇情係咪真係需要，如果遇到好鍾意嘅戲，導演又堅持，一定會問老公，不過佢通常都OK。（唔再唱失戀歌？）會唱帶畀大家希望嘅失戀歌，會諗第時個女失戀，都唔想唱首歌令佢更加鑽牛角尖，要叫佢振作，作品擺喺度就一世o架！」
不排除親子合唱
問到會否考慮推出親子合唱？她表示可嘗試︰「佢好鍾意唱歌、好有表演欲，睇過我做巡演，令佢有個好深刻嘅印象，依家我一化妝話去做嘢，佢就會問『你係咪去開Concert？』但細路仔喺屋企就唱得好開心，一去到錄音室就淆底，會驚到唱唔出。」問到她可會唱兒歌？GiGi就搖搖頭，因目標Fans不適合。
場地︰House 1881
服裝︰Edition