陳煒緣來在半空淆底失良機

陳煒錯手打到黃智賢爆缸。

陳煒、Ben及翟威廉前晚到觀塘出席無綫新劇《好日子》首播飯局，今次飯敍由陳煒代言的酒樓老闆贊助。席間Ben劇透指陳煒「蝕底」給張達倫，她笑答：「蝕底嗰個其實係我年輕版，即係吳嘉儀，我只係負責武打場面，好似用手機扑到Ben爆缸！」陳煒又指終有時間與「朋友」嘗試了解：「未知啱唔啱。之前都試過喺飛機上畀人搭訕，佢留咗電話畀我，但我擔心人哋嘅背景，所以冇下文。」

黃智賢屢被誤會

Ben則表示劇情會交代自己被陳煒誤會長達30多年，問到現實生活可有類似情況發生？他說：「畀人誤會一定有，時間可以證明一切，最記得一次係求學時期，老師以為我練精學懶，直至後來寫紀念冊，好多同學都對我有正面評價，老師就知道怪錯咗我，呢樣嘢係令我好感動。」

翟威廉齋睇冇得嗒

另外，經常「當兵」的翟威廉於戲中獲兩位靚女余思霆及簡淑兒「迷戀」，難怪他笑說：「起碼我喺戲裏面好受歡迎。」問到現實生活中兩女誰是他「那杯茶」？他醒目答：「真係唔知喎！兩杯茶都要相處吓先知。（冇拍拖？）自己都想，但近期網絡直播工作忙爆，係要招呼好多女歌手，但都係關於歌曲嘅嘢，幫佢哋執歌。有好多茶杯招呼佢哋，我有得睇冇得飲！」

眾演員約埋睇無綫新劇《好日子》首播。

翟威廉呻忙爆冇時間拍拖。