捧場仆甩牙成身血 千嬅重施「護」技救母
楊千嬅前晚在澳門開騷，之前已在內地不同地方完成8場巡唱的她，今次獲楊家總動員撐場。原來在佛山一站，楊媽媽不慎「仆甩牙」成口血，當時千嬅「重操故業」護士上身為阿媽止血。
千嬅一連兩場《MY BEAUTIFUL LIVE楊千嬅世界巡迴演唱會》澳門站前晚舉行頭場，以婚紗造型揭開序幕，接連唱出《可惜我是水瓶座》、《煉金術》及《小城大事》等作品，唱到《Wonder Woman》時，台下觀眾更興奮站起來拍和。她之後與觀眾打招呼：「我一路希望有生之年可以去到唔同地方表演，一次就足夠，終於今年不遲也不早做到。」並有感而發：「要完成表演需要好大嘅勇氣，自己嘅初心同勇氣從來冇變過，多謝你哋畀呢個回憶我。」
爭啲畀囝囝搞喊
今次演出，除了老公丁子高做監製，兒子Torres、父母及奶奶都有到場支持。千嬅本以為兒子已回去睡覺，但看到他在觀眾席時即說：「哦，阿仔仲喺度喎！」並多謝老公：「凡事都好緊張，仲緊張過我嘅丁子高先生。」
完騷後，千嬅在後台受訪，她表示下周六演出北京站，之後會放一個月假陪兒子，又感慨地說兒子真的大個仔：「佢會幫婆婆拉櫈，又會照顧身邊人，食晏時同我講Good Show，聽到我爭啲喊出嚟。」她還提到之前佛山站散場時，母親不慎仆倒：「見阿媽流到成身血，佢仆咗落地撞甩隻牙，真係嚇死我，好彩仲記得當年做護士啲伎倆，識同佢敷冰，然後即刻返香港睇醫生。」並透露母親縫針後沒有大礙。
特派記者衛紫敏澳門報道