陳敏之難忘囝囝出世 諗起打冷震

囝囝雷子樂已兩歲半，「索腿靚媽」陳敏之每次講親子樂都滔滔不絕，流露出濃濃母愛：「呢兩年幾裏面，每一個同小朋友嘅畫面都好難忘。最難忘係佢啱啱出世，懷胎咁耐生佢出嚟，第一下喺個肚度出嚟嘅喊聲，我每一次諗起都會感動到打冷震，嗰種感覺真係好震撼，一生都唔會忘記。而第二個難忘時刻，係佢識得嗌爸爸媽媽，仲要係嗌我先，嗰刻真係好有成功感。」

湊仔難過做生意

問到有沒有不快事？她坦言早前囝囝染上甲型流感，病在兒身、痛在母心：「佢不停發高燒，燒到成40度，食藥都退唔到，做阿媽嘅真係48小時都瞓唔到，寧願自己有事，畀晒我受，都唔想佢辛苦。」

為人母親後，陳敏之面對不少挑戰，雖然辛苦但也覺值得：「我平時管理生意同事業，覺得好容易應付，但原來要我去管理一個小朋友，由一張白紙到佢長大成人，係非常之艱辛，亦係一個好大嘅責任，所以我會繼續努力，做好媽媽呢個角色。」

育兒心得

1.保持自己身體健康，若生病有機會傳染小朋友。

2.除了有耐性，EQ亦要高。

3.發揮創意，令小朋友有學習興趣。