余思霆怕醜 朱敏瀚出口護花

陳煒、黃智賢、余思霆、朱敏瀚、簡淑兒等昨日到圍村為無綫新劇《好日子》宣傳，期間獲小朋友舞麒麟助興，場面熱鬧。戀情曝光後首度孖住現身的思霆與敏瀚，被問到拍住拖工作是否很開心？思霆即表現緊張，僅表示宣傳的確開心，但隻字未有提到男友，在旁的敏瀚即出口相助，對於被指是定情劇，他笑說：「其實係呢套劇認識，未咁快開始拍拖。（思霆平時都係咁斯文？）都斯文嘅。」被男友公開讚美，思霆忍不住冧爆回應：「多謝！」

拍拖學雙語

問到思霆為何如此尷尬？她說：「第一次一齊做訪問，感覺好奇怪，又驚講錯說話，因為廣東話唔夠好。」敏瀚就表示平日與女友會以普通話及廣東話交談：「思霆廣東話未必好好，我普通話又唔好，互相幫助，一齊學習。（思霆係咪乖學生？）都幾乖，好上進。」問到思霆可認為男友普通話有進步？她自言平日心急便會講普通話，男友聽不明時也會問，不過敏瀚即爆曾被對方嫌棄：「佢話唔好同人講，女朋友講普通話。」

坑渠釣魚

而陳煒則透露年幼時暑假於圍村住了兩個月：「唔知點解，記得細個有次打風好大雨，池塘嘅水倒灌，令到啲魚、蝦沖晒去坑渠度，我哋就釣上嚟做海鮮餐，平時池塘上有荷花，夜晚會見到螢火蟲。」