蘇永康開騷講後事揀定靈堂歌

蘇永康晒低V，隱約晒操弗成果。

蘇永康（阿公）一連兩場紅館騷《ALL THAT JAZZ (& POP) LIVE》前晚開鑼，個唱中提到事業高山低谷，指一早想打入台灣市場，命運安排下獲台灣歌手范曉萱當時的經理人賞識，其後過檔至黃柏高旗下，唱片銷量由2萬升至8.5萬張創佳績，但受到金融風暴及翻版唱片問題影響，銷量直線下滑！

《紅顏知己》冧老婆

當時自覺於台、港沒有發展空間，阿公北上內地拍攝一部130集電視劇，直到2007年終於有翻身機會：「有位楊先生打嚟話想同我喺台北開演唱會，我拖住個問號返屋企同媽咪講，佢就話『喺邊度跌低，就喺邊度企番起身』！」這番話獲全場Fans拍手叫好，他續說：「開咗兩場騷都爆晒，雷頌德提議即刻出歌，就出咗《黑色禮服》同《紅顏知己》，《紅》就係要送畀當時未求婚嘅太太。」至於《黑》，他自爆已立平安紙註明他日離世後，指定這首歌是靈堂「主題曲」。

感激紅館冇「彈鐘」

個唱邀得胡定欣任嘉賓，兩人合唱《來夜方長》後，阿公送上抱抱作感謝：「當初搵你都戰戰兢兢，唔知你敢唔敢玩，但就係你敢玩先有今日嘅成績！」Encore時，換上黑色Bling Bling西裝褸的阿公再次出場，自嘲去年重新撻着對音樂的熱誠：「唔知係咪關我個仔事，但我都50歲人，行咗生命嘅一半，再留喺Safety Zone都唔太對，多謝大家同我一齊癲！」又晒紅館「零彈鐘」紀錄︰「好多歌手都唔記得多謝一個單位，就係紅磡體育館，我加埋開咗八次騷，每次入紙都冇『彈鐘』，希望再入紙都咁順利！」

與胡定欣合唱後，蘇永康攬攬答謝。	放大圖片	企喺高台講高低起跌，特別啱Feel。