周柏豪「露宿」機場18粒鐘
歌手周柏豪前晚出席活動時否認太太懷孕之說，直言有好消息便會公布。剛從上海返港的他，難忘兩年前出席同一活動時，曾被困18小時，被迫「露宿」機場。
周柏豪、鄭俊弘（Fred）及吳業坤前晚現身電視城，出席《2019勁歌金曲優秀選第一回》。剛從內地出席本屆「上海電影節」返港的柏豪透露此行僅逗留兩日，會合英皇電影《感動他77次》拍檔蔡卓妍（阿Sa）行紅地氈，並說：「兩年前我哋都去過一次，因航班問題，喺香港機場滯留咗18小時。當知道要改第二日飛，好多地方都閂咗，我哋最終搵咗航空公司Lounge瞓咗兩粒鐘，所以今次算好順利喇！」提到太太傳有喜，他說：「老婆着鬆身衫着咗2年，而且我架車好高，扶上落車好正常，有好消息嘅話我一定同大家分享。」
鄭俊弘睇活士偷師
另外，Fred早前忙於補拍劇集《法證先鋒Ⅳ》，幸已殺青，他讚拍檔湯洛雯狀態好，記者笑問對方是否解除了「不瘦降」？Fred笑說：「有同佢研究呢個問題，我覺得完全唔食嘢嘅話，身體感受到就會盡量鎖住卡路里，所以唔進食反而唔會瘦。」提到女友何雁詩與父親的深情專訪，Fred睇完都覺感動：「佢兩父女都鍾意做運動，依家又一齊去新加坡打比賽。（你球技點？）有進步，但係BB班，最近有睇活士比賽，希望從中拿捏到竅門。」
至於吳業坤近日趕拍新劇《大醬園》，休息時間寥寥可數：「依家一星期有三、四日踩得好甘，但同戲內媽媽康華合作得好開心，估唔到佢咁玩得，仲話要留層樓畀我。」由於連月忙工作，他表示計劃八月放一個月假：「想去日本同歐洲旅行。其實之前拍《殺手》已經想去， 但監製話我戲份多唔畀，我冇咗張價值五位數嘅機票。希望今次一個人去、十個人返。（咁貪心？）交多啲朋友嘛。」