李佳芯谷收視：最叻係奶露！

李佳芯自認冇身材，唔肯着泳衣派福利。

藝人馬國明、郭晉安、李佳芯（Ali）及馮盈盈等，昨日出席無綫劇《白色強人》宣傳活動，即場公布首集收視平均有28.7點，成績理想。馬國明坦言估不到收視如此理想，記者笑他的角色造型靚仔，有助收視，他謙稱：「我唔敢講，但好多朋友都話未見過我咁有型。」問到若有更好收視，會派甚麼福利？他笑言：「要露嘅話就搵女藝人，我哋套劇個個都係女神。（你係男神，會做啲乜？）你問安仔，我睇佢頭。」

認孤寒唔着泳衣

Ali聽完馬國明的提議，即語出驚人說：「我最叻係奶露！」之後解釋：「係椰汁鮮奶露，我係得呢啲奶，你哋想我畀咩奶大家？（着泳衣？）我阿媽都未見過，我喺咸豐年代拍旅遊節目同拍劇有着過。（你好孤寒。）我係孤寒啲。（今次突破吓囉。）我身材冇乜突破，呢個唔係我強項。」並反建議男藝人應該露腹肌。

馮盈盈平時語出驚人，估唔到今次輸畀李佳芯。	馬國明示範拉筋健康操。	郭晉安讚馬國明角色討好，有望做視帝。

• 一眾《白》劇演員很開心收視理想。

馬國明唱歌好聽

至於安仔笑言沒有腹肌，無意半裸谷收視：「我啲腹肌未練好。（馬國明話睇你頭。）叫佢唱歌吖，馬國明唱歌好好聽，我同佢一齊登台合唱過《沉默是金》，如果收視有33點就唱。（但李佳芯要求露腹肌。）點解啲女藝人咁唔矜持？呢個風氣唔得，應叫女藝人露八舊腹肌，依家啲女藝人好犀利。」問到有沒有信心贏視帝？他指馬國明的角色柔情又討好，會投對方一票。