黃翠如潑冷水：洪永城女友大把選擇！
藝人黃翠如與王敏德女兒王麗嘉等，昨午在中環出席手錶品牌活動。翠如透露7月會與老拍檔洪永城「合體」拍攝旅遊節目：「我哋有5年冇合作，曾經以為唔會再一齊主持節目，呢次可能係最後一次！我同佢識於微時，彼此零容忍，試過拍緊節目嘈起上嚟，足足鬧咗15分鐘，連監製都叫我哋不如拍完先鬧，之後拍嘢零眼神接觸！」
她又笑言日前偕老公造訪洪永城家中：「發覺佢養咗隻老狗，完全係老人與老狗Feel，突然覺得佢好孤寂！如果日後佢住老人院，我同老公會去照顧佢！（人哋有女朋友o架！）佢女朋友條件咁好，應該有好多其他選擇啦，連佢自己都咁講！」
至於王麗嘉被問到準備了甚麼父親節禮物，她說：「我哋三姊弟夾份嘅，依家唔講得，會係貼身實用嘅。（內衣褲？）呢啲成日買，我知道佢Size。（呢方面爸爸有乜喜好？）顏色佢冇所謂，Crazy Pattern佢都鍾意，最緊要舒服！」
