佘詩曼心郁率港姐泳裝出鏡!

藝人佘詩曼繼推出自家唇膏品牌後,再染指泳衣設計,更有意贊助本屆港姐競選。自言多年沒穿泳裝示人的她接受健康性感,更展示泳裝近照!

佘詩曼近日與泳衣品牌合作,設計10多款泳衣推出市面。昨午,她與一眾Hot爆模特兒齊齊出席發布會,受訪時表示:「本來想設計埋童裝泳衣,不過遲咗先諗到,趕唔切喇!我有十幾個契仔契女,佢哋直頭可以一齊行一個騷。(咁你可以着泳衣拖住佢哋行。)可以考慮o架!」

興奮衝上台

阿佘表示幕前最後一次以泳裝示人,已是拍攝劇集《無名天使3D》。問到目前會否介意性感現身?她說:「唔抗拒嘅,健康性感就可以,之前我都貪得意,喺泳池邊影咗幾張泳衣相。(會唔會贊助今年港姐佳麗?)其實呢個品牌以往都有同港姐合作過,今年亦有接觸,不過因為港姐主題未定,我哋會繼續聯絡。如果贊助到嘅話,可能我會興奮到上埋台呢,講開都勾起唔少當年選美嘅回憶!」

拍劇捱到瘦

提到身形似乎清減不少,阿佘打趣說:「近排因為辛苦得滯,依家同唐嫣開緊古裝劇《燕雲台》,要拍多3個月先收工,會去內蒙同橫店等地拍外景。今次要拍打戲之餘,每日服飾仲三層厚,唔敢想像再熱啲點算,開工都令我諗起拍《延禧攻略》嘅時候。」