Kylie搞「性奴派對」被轟冇腦

Kylie以人氣美劇《侍女》（The Handmaid's Tale）為主題，為Anastasia Karanikolaou舉行生日派對。眾人包括壽星女Anastasia及「星二代」Sofia Richie等，紛紛穿上劇中代表「侍女」等級的紅色服飾，她們在社交網分享影片時自言最愛這部劇，入晒戲引用劇中對白，並稱呼男人為「Commander（大主教）」！雖然純粹貪玩，不過此主題就引起極大爭議！

嘲諷「自甘墮落」

事緣該劇改編自反烏托邦小說，內容講述極權社會下女性被分等級，不但未能讀書及工作，更成為「性奴」，淪為男性的生仔工具及下人，女主角極力反抗此制度。Kylie的「侍女」造型曝光後惹來大批網民不滿，留言狂轟她冇腦及美化性奴，不少人更寸她根本不了解劇集內容：「有冇人話畀Kylie知，『侍女』就係被強姦同剝奪自由，仲有被當成家牛一樣？」有網民直斥Kylie標榜自己是女強人，卻扮成「侍女」自甘做性奴及下人，亦有大批網友以惡搞圖表示對其行為冇眼睇！

不過你有你鬧，Kylie懶得回應，昨日如常在社交網甫相，上載穿粉紅色水着與Anastasia的戲水照。