黎諾懿封「港普教父」

無綫藝員黎諾懿昨日與湯盈盈等在將軍澳電視城出席六月星辰活動,他最近在節目中大晒港式普通話,被網民封為「港普教父」,他說:「我要澄清呀,小朋友千祈唔好學,係反面教材,我細個冇讀書先會搞到少壯不努力,老大徒傷悲,我個仔更加唔好學,唔好以為我係榜樣。」他又笑謂早知會「出事」:「原本我只係一集,心諗唔係好覺嘅,唔知係咪監製覺得好笑,最尾變成兩集,大家當係睇韓劇《鬼怪》咁睇字幕。(的起心肝學普通話?)有學過先咁流利,依家好矛盾,網上好多人都叫我唔好學普通話,話會冇咗特色。(約老友鄭伊健切磋普通話?)佢依家講得好好,我青出於藍冚咗佢!」

本月30日生日的湯盈盈會與老公一家四口及朋友到蘇梅島旅行慶祝,為着泳衣積極減肥,卻因多菜少肉變成燥底:「生咗第一胎已經三年,冇減過肥,用咗三個禮拜減咗七磅,錢嘉樂都話要減喎!」