衛詩雅掹槍慢半拍勝在夠辣
衛詩雅、陳家樂及苗僑偉最近結片緣，苗僑偉指詩雅在戲中表現狠辣，詩雅則大讚對方有型，是她與家樂的模仿對象，每次有他的場口，兩人都會衝到螢光幕前偷師。
藝人衛詩雅、陳家樂與苗僑偉早前合作拍攝《掃毒2：天地對決》，三人飾演警務人員，而詩雅與家樂是苗僑偉的下屬，當中不乏刺激槍戰場面。其中一幕苗僑偉率詩雅及家樂等人深入虎穴，爆發連場槍戰，氣氛緊張，他們入到屋內發現背脊插滿針筒的喬寶寶。鏡頭前大家表現認真，不過鏡頭後詩雅與家樂玩鬥快掹槍，但詩雅明顯慢半拍有多，非常搞笑。
封陳家樂「男神」
經常飾演警務人員的苗僑偉笑問兩人覺得他的表現如何？他們都大讚對方好嘢及好勁，他就反讚兩人：「你兩個梗係勁，一個靚仔，一個係小辣椒，咪睇佢細細粒，唔係講笑，好狠。」
對於被封為「小辣椒」，詩雅坦言大感開心：「因為佢睇到我好辣嘅一面，之前拍戲比較斯文，今次係幾好嘗試，畀到呢個印象佢都係成功。至於家樂當然靚仔，全香港都覺得佢靚仔，係男神。」她又指跟前輩合作獲益良多，因為她與家樂甚少拍動作戲，苗僑偉成為兩人的模仿對象：「三哥（苗僑偉）每個開槍動作都好有型、好靈活，有一樣佢好犀利，好多時候我哋開槍會眨眼，但三哥唔會，佢好定，呢樣要向佢學習，動作方面佢好有型，每次到佢拍嘅時候，我哋都會衝埋個Mon度睇。」
