高海寧被姦自我催眠當冇事
楊明、高海寧（高Ling）主演的無綫劇集《婚姻合伙人》播至結局篇，劇情開始進入高潮，前晚一集交代高Ling終發現家庭及親情的可貴，不欲丈夫楊明因女兒繼續誤認黃德斌為父而傷心，找德斌剖白一切時竟遭強姦，之後她到藥房買「事後丸」被楊明發現。被姦後她身心受損，躲在洗手間喊，對鏡自我「催眠」當冇事發生！
昨日高Ling說起這場戲時仍投入得哽咽：「因為貝競枝（劇中角色）由細到大慣咗獨自面對所有事情，一有事就會自我保護。我處理呢場戲時，係因應佢個性格去諗，佢自言自語，其實係安慰緊自己，因為大叫大喊無補於事，要冷靜處理，劇中間地產公司係佢同朗朝勇（楊明飾演）一家人捱出嚟，唔可以畀佢有事，件事亦唔可以畀老公知道，就匿喺廁所喊，處理晒先搵老公。」
